هلال الثورة بينور
على دى الدار
وبكرة نشوف هلال تانى
بيرسم زفة عربية
نعود أحرار
نغنى لحن من تونس
بضرب النار
وشرف الامة يا حرة
وطعم آهاتك المرة
على شهدائك الأبرار
لابكرة الظلمة يتبادوا
وابو القاسم
ف يوم قاللى
هلالى ونجمتى قادوا
ولادى المخلصين عادوا
انا يا نجمة المغرب
لقيت ترياقى من عارى
على معزوفة الثورة
بدون أحلى أشعارى
على نغم الآهات فيكى
بلاقيكى..
بتضوى بكل ما فيكى
بنور مالمغرب العربى
بيسطع ضيه جوانا
ويبقى ف كل حته هلال
بلادنا الحرة يزدادوا
وتلقى المخلصين عادوا
وابو القاسم صحيح غايب
لكن موجود
بروح الثورة من قلمه
يعيد ذكرى بلاد تونس
نعود أحرار
ونرسم زفة عربية
بضرب النار
تأليف/ محمد أنور أبوزكرى
بحبك حب خلانى
ابيع أهلى وخلانى
بقربك لتقى قلبى
ولو تنسينى ينسانى
بحب الشوك ف أوراقك
يا وردة جوا بستانى
بتسقيها عنيا دموع
وتطرح وسط أحزانى
ومرة واحدة ألقانى
بحبك حب خلانى
ابيع أهلى وخلانى
بحبك فوق ماتتمنى
تلاقى حد يشتاقلك
وألقاكى بعيد عنى
يحاول قلبى يندهلك
أخاف منك تصدينى
وأقو راجع
ومن تانى
أحبك حب خلانى
أبيع أهلى وخلانى
تأليف/ محمد أنور أبوزكرى
مدد يا صاحبة العصمة
يامبتسمة
ياروح طايرة مع النسمة
يانور قلبى (ف) ضلام ليلى
يازيت نوّر قناديلى
يا مكتوبالى فى القسمة
يا صوت المئذنة العالى
بيدعينى لصلاة العصر
مدد ياروحى .. ياجروحى
مدد ياضحكى .. يانوحى
ف عز الآه بغنيلك
وتدعى عليا..
وادعيلك
الاقى التاج على جبينك
واشوفك..
وانتى زاينة القصر
مدد يا عمر عشق الروح
مدد يا مالية قلبى جروح
مدد وابكى على صدرك
واسيب دمعى بسرى يبوح
واخاف تاجك يقع منك
تضيع منك ..
حلاوة النصر
واقوم رافع رايات حمرا
بدم شهيد
واقول .. وأعيد
مدد يا فرح أيامى
مدد يا حلم ف منامى
بيتفسر..
بكم الضى ف عنيكى
وادوب فيكى
والاقى العشق بينادى
واحاول اعد عشاقك
فملقاش حصر
وبرجع ليكى يا حبيبتى
اقولك مهما طال العمر
ولو هايزيد عدوينك
ولو هايقل عشاقك
بيكفينى ان انا عاشقك
ويكفيكى انك انتى مصر
تأليف/ محمد أنور أبوزكرى
بقولك إيه وحشتينى
وعمرى بقيسه بحنينى
ومن غيرك أعيش إزاى
بقولك.. يالا ضمينى
دانا قلبى
عشان خاطر
بعدتى يومين
بقى مجروح
وروحى كت خلاص
هاتروح
ودا كله حصل علشان
فارقتينى..
واقولك إيه وحشتينى
بحبك حب أوصافه
محدش قبلنا شافه
ونظرة ليكى يا حبيبتى
بكل العمر
ولو ايضاعفوا
(ف) سنينى
واقولك إيه وحشتينى
تأليف/ محمد أنور أبوزكرى
