الثلاثاء، 14 ديسمبر 2010

شط أحزانى


فتحت الراديو عالقرآن
وتوهت فى شط أحزانى
لقيت مركب غُنى ماشية
تشق الموج..
وموجة بتسبق التانية
وفجأة النوة حاصرتنى
فى أحلامى
لقيت قلبى بيصرخ آه
وتاهت بيا أيامى
وراحت بيا وسط البحر
لقيت الخوف محاوطنى 
بسرعة جريت وفجأة لقيت
بيجرى ورايا قرش وحوت
جريت منهم شمال ويمين
وانا ماشى لقيت سمكة
فى عرض الموج
بتتمنى حياتها تدوم
وعايشاها
ولا شايلا لها أى هموم
جريت فجأة ورا منها
(ف) لحظة اتصورت ليا
كما صورتى
وانا مذعور..
لافجأة أتوه فى بطن الحوت
كما التايهين
فى لحظة وقفت
حلفت انى ماكون منهم
سمعت الراديو بيقوللى
ولا الضالين
تأليف/ محمد أنور أبوزكرى

الأحد، 12 ديسمبر 2010

رباعية غريب


غريب مالهش وطن (ف) الحياه
سافر ولف ودار لحد اما تاه
قال إنه رايح آخر بلاد الكون
فتح لقى بدايته.. هى منتهاه
وعايش

تأليف/ محمد أنور أبوزكرى

احكى يا شهرزاد


احكى يا ست الشهور
يا شهرزاد
إحكى عن أول لقى
(ف) أول معاد
واوصفيلى الكون كما
عاش ملحمة
لما ابتدت دقات قلوبنا
فى الازدياد
ساعة مادوبنا دوب
يادوب
همس المشاعر
هز أوتار القلوب
فدوبنا دوب
رعشة إيدينا
والسلام
من غير كلام
ماعرفنا نبض قلوبنا
راح ولا عاد
واحكى يا ست الشهور
يا شهر زاد
احكى عن عهد اتكتب
جوا القلوب
وازاى نلاقى للشمس ضى
وقت الغروب
والضى ماشى فى الدروب
يحكى عن معنى الامل
يحكى عن قلب اتعمل
بنظرتين
لين كما حته عجين
والعشق دب (ف) نفسنا
كان نفسنا
نفضل كدا طول عمرنا
متشوقين
متجمعين
دايبين لؤا
ولا ييجى ويفرقنا
يوم بعاد
واحكى يا ست الشهور
يا شهر زاد
تأليف/ محمد أنور أبوزكرى

الأحد، 5 ديسمبر 2010

بنحب الحياة


إحنا بنحب الحياة
إحنا ضحكة (ف) قلب آه
إحنا صوت عصر السكوت
إحنا نور كسر التابوت
ياللى (ف) قلوبكم عنين
إحنا لسة موجودين

مش بنظرة تكسرونا
قلوبنا أقوى مالجبال
ياللى مش عارفيننا إحنا
عزيمة تتحدى المحال
إحنا غنوة لحنها
يعدل الفن اللى مال
مال عليكم.. غنى ليكم
طلعت الشمس (ف) سماه
واحنا بنحب الحياة

شوفوا طه فى الكتابة
والشريعى عملوا إيه
فنانين عملولنا فن
 التاريخ شاهد عليه
قلبهم نابض بفكرة
والزمن فاتح إيديه
كان طريقهم كله شوك
لكنهم لمحوا ضياه
واحنا بنحب الحياة

واحنا لما قلنا آه
والرصيف يشهد علينا
لولا على بابا الحرامى
كت حقوقنا بين إيدينا
وانضربنا.. واتوجعنا
فى حمانا ماكتفينا
مطالبة بحقوقنا اللى ضايعه
وبحاضرنا اللى تاه
واحنا بنحب الحياة
بردو بنحب الحياة
تأليف/ محمد أنور أبوزكرى

الأربعاء، 1 ديسمبر 2010

عيشها بهدف


حياتنا ومهما بنقاسيها
هانعيشها..
مرسومة جوانا
وفين احنا .. ومين احنا ؟
سؤال محتاج يلاقى الرد
فكر كدا واحسبها بجد
هاتشوف نفسك جزر ومد
عقل وقلب وجذب وشد
فكر فين جواك الحلو
تلقى الحلو كتير حواليك
فكر فيك..
إحلم انك تكبر بيك
تلقى القسوة اتقلبت ضحكة
والدنيا احلوت ف عنيك
شوف نفسك سنتين قدام
برمج عقلك عالإقدام
إوعى تفكر فى الأحلام
على إنها رمز الأوهام
لكن شوف إزاى تصنعها
تلقى الحزن انتهى ومافيش
بس تعيشها .. تحس قيمتها
يومها تشوف إزاى هاتعيش

تأليف/ محمد أنور أبوزكرى

نملة


نملة وماشية والصحارى سكون
عجبت من أكلها.. صحرا وفين بيكون
ضحكت ومالت عليا ووشوشت ودنى
قالت لى ربك قادر ..خالق نظام الكون
وعايش
تأليف/ محمد أنور أبوزكرى

دنيا الكلام


أعجب من اللى يتوه ف دنيا الكلام
ياكل كلام والشرب قطعاً كلام
هو صحيح الجهل أصبح شبح
ولاّالشبح قطّع لسان العلام
وعايش
تأليف/ محمد أنور أبوزكرى

الاثنين، 29 نوفمبر 2010

رباعية عفريت


عفريت وجاب عفريت.. وإيه الجديد
والناس بقت لايقة فى توب العبيد
أبكى على الظالم ولاّ اللى انظلم
الجوز هايبقوا تراب وبإيه بكايا يفيد
وعايش
تأليف/ محمد أنور أبوزكرى

الأحد، 28 نوفمبر 2010

ما بين شطين


ما بين شطين
بشوف الكحل متعانق
مع المية
بيعمل حركة ثورية
بيتدلى على عيونك
ورمشك خافه قام سايبه
يعدى لخدك الجذاب
يبوس الخد وكأنه من الأحباب
واغير من كحلتك وامشى
واشيل حبك على كفى
واحطه جوا سندرتى
واقوم قافل عليه الباب
فى غفلة من يتسحب
يزور قلبى
يتوه جواه
انام والقاه
ملك روحى ..
ملك عقلى..
واقوم اصحى على الأشواق
أنا اللى العشق كان قدرى
وشوفت فى سكتى قمرى
ودوبت بنظرتين ويادوب
بقي محبوب
سألته إنت جيتلى منين
يقوم رادد
ما بين شطين
تأليف/ محمد أنور أبوزكرى

السبت، 27 نوفمبر 2010

نبتة الحنظل


لازلت أحدق في المرآة ولكنني لا أرى شيئاً غير شبح جسد قد تآكل عبر الزمن كان هذا الجسد فيما مضى حالة من الأفراح تغدو البسمة حيث يغدو وتروح الضحكة حيث يروح .. كنت ملاكاً يمشى على الأرض لا يتذوق طعم الأحقاد ولا يعرف معنىً للأحزان ..كنت المحبوب الأوحد .. كنت المدلل الذي لا يفوقه أحد في دلاله .. وإذا بقلبى قبل عشرون عاماً مضت يبدء في التآكل وروحى في التيه ما بين عمر سعيد مضى ومستقبل مبهم لا آمن غدره حينما حدثت تلك الحادثة التي لا يمكن أن أنساها قط .. تلك الحادثة التي قتلت مُقل عيونى .. أبى .. أمى .. حتى تلك الفتاه التي كنت ألعب معها الألعاب الطفوليه مثل فتحى يا وردة وعروسة وعريس والتي لطالما كنت أعشق اللهو معها .. ومع أننى الوحيد الذي نجا من شبح الموت .. إلا أن شبح العجز تمكن منى حتى جعلنى أنا نفسى شبح في عيون من يرانى .. أصبحت شيئاً تزدريه العيون حتى عيون من أحبونى منذ أن أصبحت ذا عاهة .. الكل أشعل نار الحزن الدفين في قلبى بتجاهلهم لى أو بنظرة الشفقة تلك التى تقتلنى دوماً .. كنت أول من يطلب الأطفال منه أن يلعب معهم .. ولكننى الآن أشاهدهم من بعيد ولا يلقون لى بالاً .. أصبحت كمثل نبتة الحنظل فى ظل شجرات الفاكهة .. بدأت في الانطواء على نفسى وإخفاء قلبى المحطم عن كل العيون الناظرة إلي بنظرة العطف .. تلك النظرة التي أكرهها .. والتي تطاردنى حيثما كنت .. تعبث بمشاعرى .. تقتل نبض قلبى .. حتى أننى بهد أعوام مضت عرف الحب طريقه إلى قلبى الكسير.. فأحببت فتاة فى مثل عمرى.. فقررت أن أحطم عجزى  وأن أخطو بعكازي على ما مضى من فشل في التعامل مع نظرات الناس القاتلة وعزمت على أن أخبرها بمشاعرى الدفينة .. فاقتربت منها وأخبرتها بكل بساطة العاشقين عن حبى لها ومدى شوقى لأن تبادلنى المشاعر ذاتها فما كان منها إلا أن واجهتني بقولها :
-       بص لنفسك في المرايا
     فبدأت أحدق في المرآة ولكنني لم أرى سوى بعض بقايا إنسان قد تآكلت عبر الزمن .. وحتى الآن لا أرى سوى هذا الشبح.
تأليف/ محمد أنور أبوزكرى


البلياتشو

عملت بلياتشو وياما ضحكت ناس
وكنت برضو ساعات قرد أو نسناس
الناس تسيبنى وهى ناسية آلامها
وافضل أنا وحدى أقاسى مر الكاس
وعايش

تأليف/ محمد أنور أبوزكرى

عاشقك

تصدقى عاشقك أنا من كام سنة
تصدقى إنتى المنى وانتى الهنا
تصدقى الموت عشانك دا الحياة
والبعد عنك.. موتى أنا
تصدقى حنيت إليكى
تصدقى قلبى فى إيديكى
تصدقى لو قلتلك .. إنتى أنا
بيكى أكون ولو هاهون .. يبقى الضنا
ليكى باعيش قدام عنيكى .. قلبى انحنى
قلبى أنا..
قلبى .. دا يبقى نيلك والهرم
هوا الحسين والمئذنة
قلبى أنا ..
قلبى يا مصر الزوق والناس الطيبين
قلبى يارحلة عمر وكفاح السنين
قلبى اللى عاشق حضنك الدافى
قلبى اللى قال الآه قام سمعها آهين
تأليف/ محمد أنور أبوزكرى

الجمعة، 26 نوفمبر 2010

التغيير


عطشان..
والقله مرسومة
على الحيطة
وجع..
ودماغى مقلوبة
من الظيطة
بلاش اسمع كلام إنشا
بلاش اسمع صدى أصوات
ديوك وعراكها فى العشه
عشان عايزة يادوب تبقى
لوحديها..
وتنزل عالفراخ تكسير
كلامكو كتير
وقال تغيير
وقال تطوير
وقال كام كلمة
معناهم بعيد عنى
وقال تيجى على الغلبان
وبتغنى..
وقال تغيير
روح غير تيجان الملك
على راس الملك نعمان
أو غير بدال السجن والسجان
وجيب إنسان
ولو ما قادرش تعملها
أنا اللى هاقول
روح جيبلى القلة من عالحيط
عشان أشرب
وهدى الدوشه دى شويه
عشان ارتاح
واشوف بكرة رغيف عيشى
عشان مانموتش بالكسرة
ولا الحسرة
ولا عقولنا تروح فيها 
ولا يدخل فى جوفنا كمان
رغيف العيش
تأليف/ محمد أنور أبوزكرى

الاثنين، 22 نوفمبر 2010

رباعية العنكبوت


دخلت بيتنا فى يوم لقيت عنكبوت 
حلفت لازمن سيادته عمداً يموت
لفيت ودورت وراه لحد أما مات
لكنى بردو ببص لقيت الخيوط

وعايش

تأليف/ محمد أنور أبوزكرى

رباعية سوط الظلم


إضرب يا سوط الظلم بالجامد
بكرة تقوم الناس وتتساند
وتبنى جوا ظلمك عدل
أقول لك.. حتى كلمة آه لمين دامت

وعايش

تأليف/ محمد أنور أبوزكرى

الأحد، 21 نوفمبر 2010

رباعية سر الكون


إيه الحياه تسوى مع الاتفاق
وليه يكون فيها لقى وفراق
عجيب ياسر الكون يامجمع الدنيا
على كلمة واحدة فيها طعم النفاق

وعايش



تأليف/ محمد أنور أبوزكرى

ريشة المغرمين


الحب ريشة المغرمين
ترسم جنين
برضع بشوق العاشقين
حواليه حنان على الشمال
يطرح أمل فوق الجبين
وعاليمين..
تلقى متاهة السنين
تلقى الفراق قتل اللؤا
خلا الأحبة محتارين
مابين العشق والدنيا
وبين قادرين ومش قادرين
تشوف الخوف بيقتلهم
وشمس بتحرق القلبين
لكن فى نهاية القصة
بيبقى العشق بين الاتنين
سوا بكرة..
سوا ذكرى..
بيفضل يوصل القلبين

تأليف/ محمد أنور أبوزكرى

رباعية العفريت


ضربت الأرض بعصايتى طلع عفريت
وقال شبيكى لوبيكى وإيش بتريد
سألته اتمنى اشوف الناس سواسية
قاللى دى حكمة ربنا ماهيش بالإيد

وعايش

تأليف/ محمد أنور أبوزكرى

السبت، 20 نوفمبر 2010

رباعية نص كيان


عايش بنص كيان وعامل حىّ
ضارب فى أرض الله ورايح جىّ
ماشى وفاكر نفسى وحديا
لقيت الناس سواسية فى كل الحىّ
وعايش

تأليف/ محمد أنور أبوزكرى

رباعية سكة الحمار


حمار وراضى بسكته وماشى
يقطع غيطان وزراعة عالماشى
مرة اتسأل رايح لغاية فين؟
قال السؤال ده مايتسألش لمواشى
وعايش

تأليف/ محمد أنور أبوزكرى

الثلاثاء، 16 نوفمبر 2010

حالة جو



 ربيعنا تاه وسط الخريف
والجو صيف
ومعاهدة بين الحر
وبين سقوط ورق الشجر
ورياح تراب
جايبة الخراب
والمد شال كل الجزر
عصفور بيتنفس أسى
وعشه بالغدر اتكسى
والحب فينه
مالوش أثر
أمطار تلوج جوا الضماير
تسقط.. تدوب
تعمى البصاير
وفى الحقيقة اللى صاير
بركان انانية انفجر
خلف لنا فى الجو زيف
وربيعنا تاه وسط الخريف 

وسط الشطوط مركب أمل
جنبه هلال راكب جمل
على فين يروح
وايه العمل؟
من لعبة الشبح المخيف
وربيعنا تاه وسط الخريف

تأليف/ محمد أنور أبوزكرى

الأحد، 14 نوفمبر 2010

مابحبكيش


مابحبكيش ولا بعيش
علشان عنيكى
 ولا بدوب فى كل لحظة
مالخوف عليكى
لاييجى يوم والاقى
إيدى سايبه إيديكى
واروح ماجيش
مابحبكيش

مابحبكيش فماتخافيش
لاتكونى جارحانى
انا مش شاريكى عشان تحسى
إن انتى بايعانى
شوفى نصيبك
انا مش حبيبك
وروحى يالا
وسيبينى اعيش
مابحبكيش

قولى سلام
خلص الكلام
أصل اللى بيننا
مكانش حب
كان تمثيلية فى الغرام
وكرهت أحطك عالافيش
مابحبكيش

تأليف/ محمد أنور أبوزكرى

الجمعة، 12 نوفمبر 2010

إيه الحياة

إيه الحياة 
وليه بنطلب ودها
وليه نعيشها
بحلوها وبمرها
وازاى بنمشى فى ضلها
مع إنها
قاسية أوى على أهلها
يومين عسل فى عمر مر
عايشينها لكن فى يوم
أكيد منها نمر
متسلسلين
ماشيين نجر
ومانفوخين
لكن محدش فيها حر
أكبر كبير مش قدها
وازاى بنمشى فى ضلها
مع إنها
قاسية أوى على أهلها

ربيعها للى فالقصور
واللى على كتافهم نسور
أما اللى ساكنين العشش
ولا القبور
دول الكسور
عايزين يهجوا منها
وازاى بيمشوا فى ضلها
مع إنها
قاسية أوى على أهلها

تأليف/ محمد أنور أبوزكرى

ضمنى


ضمنى خدنى فى حضنك
 قلبى دقاته تناديك
خلى عينى تضم قلبك
جوا فى الننى تداريك
ياللى قلبى بكل نبضه
 مشتريك
والحكاية لو حياتى
هى اصلاً ملك ليك
والنهاية اللى بمماتى
رافض أنا دمعة عنيك
عارف إن الحب بيننا
حب من جوايا بس
بس بحلم إنى الاقى
يتولد جواكى حس
حتى لو فضلت احبك
حب وصل للجنون
بردو هافضل أحب قلبك
واتمناه ليا يكون
لو جنونى كان سفيرى
كان هايعمل 100 قضية
لو جنونى كان أميرى
مانتى ملكة بالنسبة ليا
انتى الحبيب والقلب قال
إنتى القمر .. إنتى الغزال
إنتى لو هاعيش حياتى
بألف مليون إحتمال
عمرى مالقى حد زيك
حتى لو شط الخيال

تأليف/ محمد أنور أبوزكرى

الأربعاء، 10 نوفمبر 2010

رباعية غطى عيونك

غطى عيونك من عيون الناس
لا الناس مسالمه ولا عنيكى رخاص
وانا بخاف عليكى مالنسمه
اللى يندب فى عينيها رصاص





  • ،ياعشقى

    تأليف/ محمد أنور أبوزكرى









  • رباعية طير العشق


     هاجر ياطير العشق جوايا
    إرسم حواشى القلب ضلايا
    وادعى نكون مع بعض طول العمر
    القلب سكنك والحياه جاية





  • ،ياعشقى

    تأليف/ محمد أنور أبوزكرى