يعنى إيه

يعنى إيه

تبقى انتى أمى

وابنك التايه فى قلبك

هو أنا..

يعنى إيه

أثور عشانك

والقانى متأخر ولا

مليون سنة..

واجيب عدا بدل العدا

بين دا ودا

بلعن أبو اللى 

خلانى أآمن فى الندا

يعنى إيه

أبقى شرف

من غير شرف

يعنى إيه

كل اللى 

حاكمينك قرف

يعنى إيه

تبقى مساومة

أختار مابين حريتى

أو العَشا..

يعنى إيه

تتلوى بطنى بالجوع

من طلعة النور للعِشا

يعنى إيه

تبقى انتى أم الدنيا

وابنك ماهوش فاهم

حنان الأم..

حياته بين أحزان وغم

والقهر عم

قفل البيبان

والكل بان

إن كان شجاع

أو كان جبان

أو حد طالب مصلحة

متصلحة..

علشان يسود فوق القيود

ويقوم ويعمل مدبحة

يعنى إيه نلتقى فى الدين

سياسة..

يعنى إيه نلقى الدقون

دايبه (ف)نجاسة

تعلن الكفر عاللى

خاف بجد..

عاللى حاول يبنى سد

بين الآهات..

لعبة سياسة ولا دين

عايزيننا يعنى نقول آمين؟

طيب آمين

يا مصر ردى

داحنا ولادك الطيبين

قربنا نكفر بالحياة

أعلنّا نبض القلب موت

إفرد جناحك للسكوت

خلص.. وموت

أو توه فى قلب أم

خايفة تبقى أم

واسأل سؤالك

يعنى إيه

تبقى انتى أمى

وابنك التايه فى قلبك

هو أنا..

يعنى إيه

أثور عشانك

والقانى متأخر ولا

مليون سنة..

تأليف/ محمد أنور أبوزكرى

البلابل

صحيت على صوت البلابل
لقيت صويت
نعى البلابل صفخة اولى
ف جورنال عبيط
صوت البلابل جوا ودنى
ومهاودنى
نبض قلبى جوا حضنى
كان واعدنى
يستمع صوت البلابل
على أى شجرة
فى أى غيط
لكن البلابل صوتها مات
هل الصوات
حتى الحمار
بشريطة سودا عالغبيط
وقفت على شجرة وبكيت
صوت البلابل
كان لى نور
كان لى جنية بحور
واما ماتت البلابل
سألت نفسى
هو صحيح مات الغُنى
ولا اللى مات نبض الحياة
وانا اللى وياه انتهيت
لما صحيت
على صوت البلابل
ولقيت صويت

تأليف/ محمد أنور أبوزكرى

البهلولى

البهلولى أبو نضارة
دكتور عاوز له دكتور
دايماً إيده فيها سيجارة
بس الشاب ياناس معذور
عاوز حقه فطالب بيه
آمن إن الحق فى يوم لازم يلاقيه
فكّر فكرة.. صبحت رسمة
رسم الظابط داس بالجزمة
عاللى إتمنى تتوه الأزمة
أشرف حاول يبنى الحلم
حلم الجنة اللى بيتمنى
لما نشد بقوة العزمة
نلقى لكل سؤال الرد
أشرف رسم الرسمة بجد
رسم الدنيا فى وسطها سد
فاصل بين البنى آدمين
فاصل بين باشا وصعلوك
بين المالك والمملوك
أشرف صاحبي
رسم المصرى رافع علم البلد الحرة
مع إنها عرضها مهتوك
رسم الغنوة فى عيون مصرى
وقت الغارة
رسم العيل ماشى بيلعب جوا الحارة
رسم الجار اللى بيتعارك ويّا الجارة
ماهو دا صحيح أشرف يا خوالنا
البهلولى أبو نضارة

تأليف/ محمد أنور أبوزكرى

دستور

دستور ياسيادنا دستور

عفريت لبسنا الطرطور

ورجعنا كأننا ما طلعنا

وانكشف اللى كان مستور

دستور ياسيادنا دستور

دستور متفبرك متظبط

والشعب هايفضل يتخبط

ولإمتى نلاقى اللى مربط

مش عارف يخرج للنور

دستور يا سيادنا دستور

تعديل دستورى انما إيه

نرقص 10 بلدى عليه

جم عملوها ولاد الإيه

قطعولى جناحى المكسور

دستور يا سيادنا دستور

مبروك تعديلنا المنقوص

ورئيس الدولة المحروس

على أرض الشعب المنحوس

ثار لكن بردك مقهور

دستور ياسيادنا دستور

تأليف/ محمد أنور أبوزكرى

أبو النجوم

والله زمان يا نجم هالل مالسما

عامل كما ..عقد إنما

عقد المحبة للبلد

شكله كما مصر اللى كانت إنما

إتزينت يوم عرسها

كان مهرها غنوة كتبها أبو النجوم

غناهالو الشيخ إمام

أما سلام عليك ياعم الشيخ إمام

لما تغنى الكون يقف

على غنوتك يرقص يميل

يلقى السبيل

يلقى إنه أصبح مستحيل

يبيع فى يوم

طب رأيك إيه يابو النجوم

يانجم واتحدى الغيوم

حارب بكل قوته

كل اللى باعوا بالرخيص

كل اللى ساوموا عالبلد

كل اللى هربوا فى الصراع

مات الضمير قتلوا الولد

وانتا يانجم واقفلهم

ومعاك كمان الشيخ امام

رجعوا التلامذة وبالعلام

عرفوا البداية بالنضال مش بالكلام

واتجمعوا العشاق على عشق البلد

 وانت يانجم أكبر العشاق

عايز أقولك إن قولك يا ولد

يتوه والله قدامه كل الكلام

تأليف/ محمد أنور أبوزكرى