الاثنين، 28 نوفمبر، 2011

انا العزيزة مصر


اضحك وعلى الضحكة
فوق عالي
راح تبكي يوم بالدم
على حالي
أنا العزيزة مصر
ضحكوا على عيالي
وبعد فرح النصر
قلبي اتقهر.. مالي
ماليا غير ولدي
اللي عشاني مات
دمه فطر كبدي
قاللي عشانك زاد
قاللي فداكي الدم
والعمر يا امايا
مادام في صدرك حنان
عمري فدا نهدك
اتنهدي لجلي
هاييجي يوم واخدك
لجنة البلدان
وعشق مالولدان
ولولا عمري هان
كان العدو واخدك
وخدني حزن غريب
مع ان حلمانة
حبيبي كان في الغيب
وبردو عشقانة
في ناس تعلي الصوت
وتنضرب بالسوط
تلقاها عايزة تموت
واقفة قصاد دانة
يا مدفع الغدار
ليه تبتدي بالنار
وتقتل الأحرار
وتسيبني قلقانة
وبعد موت الولد
طعم الحياة علقم
خلق ضلام الليل
خلاني اخاف احلم
واما آلام الطلق
جاتني فقلت الآه
ولأني ولاده
بدأ الباريه والكاب
يدبحني بزيادة
واما نشانه خاب
معرفش يتمادى
رسم في دقني سواد
وقاللي باسم الدين
انا اللي هاأمر هنا
وهاتفضلوا ساكتين
انا اللي بحميكوا
ماللي يعاديكوا
لو مش هايرضيكوا
فإسرائيل عالباب
أفتحلها بابك
ولا أرد الباب
هاتخضعي ليا
هاديكي لقمة عيش
ولو مفيش غية
أنا معايا الجيش
هاعلنها حرب بجد
ومش راح ارحم حد
ولما تلقي الرد
ابقي ادفعي الدية
رشي فـ طريقي شوك
يا دولة الُسلطات
أطلب فراخ وديوك
وماطولش غير سلطات
ولما اداري الدمع
دمع العيون غالي
واضحك بصوت مسموع
في عز ترحالي
ألاقي مصر تقول
ياللي على بالي
اضحك وعلي الضحكة
فوق عالي
مادمت بايع
ومش فارقه معاك امك
اوعاك فـ يوم تبكي
على حالي
 تأليف/ محمد أنور أبوزكري

الجمعة، 18 نوفمبر، 2011

مات العود

تابوت نغم 
مفتوح لجثة عود
عايز يعود
والعود دا شرقي وغلطته
صاحب جيتار
قام الجيتار
جاله (ف) نهار
ودار ما بينهم كام حوار
قلب هزار
والعود (ف) طبعه
رقة الأوتار
قتله الجيتار
قام الجيتار
عامل جنازة للشهيد
وحفل تأبين الفقيد
وقال هايتقبل عزاه
قتل القتيل
وقال هايتقبل عزاه
حضر العزا
كمان وأبوا وطبلتين
والحانوتي كان فلوت
فتح التابوت
تابوت نغم 
مفتوح لجثة عود
عايز يعود
تأليف/ محمد أنور أبوزكري

صورة باهتة



صورة الحب
اللى مالى كل قلب
صورة النبض
اللى عشش (ف) العروق
صورة الحلم
اللى ماشى فى الوريد
صورة القلب
اللى من عمر الشروق
كل صورة وليها ذكرى
كل كلمة وليها بكرة
كل صورة عمر كان
قلبى كان راسم زمان
حلم وردى
لما يبقى النيل وريدى
والقنال
قلبى اللى ناحية الشمال
والمعابد والآثار
والمداين والفنار
والمساجد والكنايس
والحروب والانتصار
والمحبة (ف) كل دار
لما اكون ام البلاد
والولاد نفس الولاد
يبقى إيه فاضلى عاد
لجل أخلص مالبيادةة
والمرض والجوع زيادة
والأكادة
إن دكتور العيادة
قاللى عندك فقر دم
والأهم..
انه خد منى كيسين
وام قولت الجوع قرص
قاللى برص
عين عليا جوز حرس
قاموا ولادى زعقوا
خاف الحرس
هربوا الحرس
رفعوا الادان
رنوا الجرس
حسيت بروحى
بدأت تعود
فجأة رجعت القيود
والرعونه والجنود
فجأة بقيت
بلد الديابة
والتعالب والاسود
كل واحد 
نفسة ياكل الفريسة
أنا الفريسة
وسيبتهم ياكلوا براحتهم
بيتى بيتهم
هانتظر يصحوا ولادى
من نومتهم
ولغاية أما يفوقوا تانى
وارسم الصورة
بألوان الأمانى
واحلم الحلم
اللى بتمناه يكون
يمكن الأحزان تهون
والتقى نبض الحياة
برا خوفى (م) العيون
جوا مصلحة السجون
تأليف/محمد أنور أبوزكري

على هامش الحب


الحب اجمل مالجمال
الحب حالة .. الحب حال
عاشق مدار قلبى اللى دار
على كل دار
علشان بيتمنى المحال
بيتمنى يكون الحب
باب داره
يكون صاحبه.. يكون جاره
يعيش بالحب
وكفاية يعيش بالحب
لأن الحب نجاره
لان الحب من غيره
مفيش دنيا
ولا أحلامنا ليها معاد
وتتحقق
ولا بالعشق 
ييجى اليوم ونتنبأ
بمين عايش يتوه (ف) هواه
ولا نوجد لروحنا حياة
ولا بيقالها أى قرار
بصوت أحلامنا مشموله
ومرسومة ومعموله
فى كل جدار
وحلم الحب ما يقدر
يفارق قلبها النونو
وبيخونها ولا تخونه
ويرسمها على الجدران
وتوشم صورته جواها
وانا قلبى يتوه مالشوق
يبص لفوق
تقوم قايلالى براحة
انا فى العشق مرتاحة
ماتتخضش ولا تحتار
لانى الحب مقدورى
وقدري هواه
ولازم يوم هاتتعلم
مفيش مهرب من الأقدار
تأليف/ محمد أنور أبوزكري

الاثنين، 29 أغسطس، 2011

مساء العيد


مساء العيد
 بشكل جديد
بثورة تلم شمل الكل
بنتقاسم على إيديها
عيدان الفل
نضم الحلم بإيدينا
فيظهر حقنا منه
يلم قلوبنا من غزة
يقوم واصل على بغداد
نسور تونس تنادينا
ترد عزيمة مصرية
بثورة مصر
 ندوق بإيدينا طعم النصر
تشاركنا بنى غازى
وسوريا أقسمت بالحق
في إيدها الحق
وبكرة تشوفوا ثورتها
يدوم المد يا بلادنا
على إيدنا وعلى إيدها
وتطرح كل أشجارنا
عنب صافى
وعناقيدها
تبوس إيد اللى مات
عشان تعيش بلده
تعيش أمه
تبوس على راسه
فيوطى..
يبوس إيدها
تأليف/ محمد أنور أبوزكرى

الخميس، 25 أغسطس، 2011

قلبى


الفرقة دمعة
والحب ضحكة
والدمعة لازمن 

فى يوم هاتنشف
والضحكة لازم 

فى يوم تموت
لكن قلبى عايش بنبضه
وفروعه طارحة 

وجدرة ناشف
وارث صلابته 

من الجدود
فى بحر همه 

عايش ماهمه
ولاقرش داسه 

ولا إخطبوط
بس الخلاصه 

ياسيدنا قلبى
عايش وعمره 

مايوم يموت
تأليف/ محمد أنور أبوزكرى

الثلاثاء، 23 أغسطس، 2011

سجنوا حسن


كان ليا اخ اسمه حسن
ومقيدينه بالقيود
لانه قال والكلمه حق
الناس أحق
بالأرض ماللى بينهبوا
وبيحكموا بحديد ونار
كان القرار
سجنوا حسن
كام شهر لجل التربيه
إزاى يهين سيد البلد
إزاى يقول ان الرئيس
راجل خسيس
والمشكلة
إن الحقيقة الظاهرة
هى الفساد
والحكم ليكى يا بلد
سيبى اللى عايز يحكمك
سيبى اللى قادر يشكمك
ويقيدك ويلجمك
يسجن حسن
بس المحاكمة كت غلط
واحنا اللى رافضين الغلط
بيسجنونا بالغلط
آه يا حسن
منك ألوف
يا شعب شوف
العسكرى يحكم عليك
والحق واضح بين إيديك
خليك لحد اما نلاقيك
مالى السجون
غيرك بيتحاكم فى قصر
والحلوة مصر
مش عايزة ترضى عنا يوم
شايلين على راسنا الهموم
ماشيين بزفة فى البلد
الحكم للى كان شجاع
واجه فساد الفاسدين
الحكم للى قال
بعمرى افدى مصر
عمره ما كان للعسكرى
المفترى..
اللى حاكمنا من سنين 
حط اسمنا فى الميتين
واما بدأنا يوم نعيش
قالوا مفيش
قتلوا ضمير الشعب  
خلوا احساسنا بموتنا 
هو إحساس الحياة
قتلوا صوتنا
خلوا موتنا
يبقى جوا سجنهم
حتى اسألوا كل اللى راح
وطمنونى على حسن
تأليف/ محمد أنور أبوزكري

الحب الخالد


يشع نوره من بدرى
وأقول بدرى
عليك تشغلنى يا بدرى
وتأمن القلوب غدرى
واتوه يقلعنى حب القلب
من جدرى
لكن بسهر ولا أدرى
أنا عايش
عشان عمرى فاضله ايام
ولاّ انا شبح الحياة
ولاّ الحياة كانت فى عصر
وانتهى ..
والمنتهى

هو الخلود
والحب خالد مش كلام
حلم ف منام
الحب خالد
بس انا بكرة هاموت
مستنى أجلى ينتهى
ألقى الخلود
أصل الحياة
موت للى يتمنى الخلود
تأليف/ محمد أنور أبوزكرى

الثلاثاء، 24 مايو، 2011

عايز أموت


قررت أعتذل الوجود
عايز أموت
لأنى مش عارف أشكّل
نفسى زى الإخطبوط
انا مش بتاع
بـ100 دراع
ولا أقدر أتواجة بقوة
ويّا حوت..
عايز أوقف الساعات
قبل السكات
لأنى جوايا حاجات
بدأت تموت
لا انا اللى بالقسوة ابتديت
ولا جريت..
أول ما بدأوا يضربوا
ولا احتميت
فى أى بيت
ولا سمعت أى حد
بيقول اهربوا
وتصدقوا..
إحساس غبى
لما تحارب
وانت وحدك فى الميدان
إحساس غبى
لو بعد دا كله
يقولوا عليك جبان
إحساس غبى
وانا اللى بالقسوة ابتديت
وانا جريت..
أول ما بدأوا يضربوا
وانا احتميت
فى كل عطفة وكل بيت
وانا اللى للعسكر ناديت
قلت اهربوا
وانا اللى فتّحت السجون
وانا اللى قننت القانون
وانا اللى كوّمت الديون
وانا اللى مشكلت 
المشاكل..
وانا اللى عقدت الحلول
وتصدقونى لما اقول
أنا الجمال وانا الخيول
قلبى بيلعن سلسفيلى
لأن صوتى اما اتولد
صحّى الولد
عشان يحرر فى البلد
وبعد دا قالوا انت مين؟
انت اللى عايز تتشهر
وتعيش سنين
انا قلت مش عايز خلود
ونفسى أعتذل الوجود
عايز أموت
مش كل شمعة بتتحرق
يبقالها زيت؟
أو طرف خيط
انا كنت بتمنى
انى اكون
جوا القلوب
بعد اما اموت
وتكونلى سمعة طيبة
لانا كنت عايز تل مال
ولا سلطة وحماية
وعيال..
انا كنت عايز تعلى بلدى
وتبقى اول البلاد
وان شالله أعتذل الوجود
وان شالله أموت
لأنى مش عارف أشكّل
نفسى زى الإخطبوط
قالوا ببيع وتصدقوا
قررت ابيع..
من كام سنة قررت ابيع
انا بعت نفسى للوطن
حتى اسألوا السجان
مين اللى باع للوطن
عمره وبرضه اتهان
ماترد يا سجان
ولا مالكش لسان
مين اللى باع للوطن
عمره وبرضه اتهان
أهلى باعونى رخيص
وتمنى كام نكته
يامنكتاتى ليه؟
بتضحك المتاعيس
ولما جيت اشتكى
قاموا جابولى تابوت
ولقيتنى بعتذل الوجود
وبدأت أموت
لأنى معرفتش أشكّل
نفسى زى الإخطبوط
تأليف/ محمد أنور أبوزكرى

الاثنين، 4 أبريل، 2011

الأبعدية


هىّ غنوة ولاّ قصة ولاّ ناس بايعة القضية
هىّ بلدى ولاّ ولدى ولاّ جسم بدون هوية
هىّ أشباح الهوان ولاّ فرد مالوهشى دية
هىّ فلاح كان بيزرع .. كان بيحصد ولاّ هىّ
هىّ زى ما كنت قايل .. هىّ أشبه بالوسية
تبقى هىّ الأبعدية
هىّ صوت الآه يدوى .. تلقى آه ورا كل باب
هىّ فلاحين فى غيطهم .. دابوا فى العيشة الهباب
ولاّ هىّ البيه فى قصره .. كان بيتغدى كباب
شافه واحد قاله حتة .. قام مسيبله الكلاب
شد سوطه عالغلابة .. وقال دى مش متسابة هىّ
دا انتو جوا الأبعدية
ولاّ دى ناظر زراعة .. كان بيضرب بالعصايا
اللى يسرح واللى يمرح .. فجأة صبح الضرب غاية
عشقه يضرب كل واحد .. خلاّ ضرب الناس هواية
حقه يضرب ده لأنه .. ما حد قاله فى يوم كفاية
حد صاحى من البداية .. حد عايش للبقية
حد جوا الأبعدية
تأليف/ محمد أنور أبوزكرى

مصر ياللى عالمحفة


مصر ياللى عالمحفة
بيجهزوا ليكى التابوت
كلمة لجل ماتبقى عارفة
قبل ما ولدك يموت
قومى قولى للى ظالم
انتا واحد كالبساريا
وابنى بكرة هيبقى حوت
قولى ياللى عالمحفة
بيجهزوا ليكى التابوت
يا بلادى يا صبيه
يامقاومة يا أبيه
ياللى كنتى بلاد قوية
النهاردة ليكى صوت
ياللى انتى عالمحفة
بيجهزوا ليكى التابوت
مصر ياما راح تكونى
فووق بساط المجد تبقى
لما تلقى إبنك بيعلى
ويبقى ف الأعداء يشوط
مش هتبقى عالمحفة
يجهزوا ليكى التابوت
بس ابنك انتى امتى
يبقى صاحب الديار
ولا اقولك إمتى يقدر
إنه يهدم اللاهوت
امتى ياللى عالمحفة
بيجهزوا ليكى التابوت
تأليف/ محمد أنور أبوزكرى

الثلاثاء، 29 مارس، 2011

يعنى إيه


يعنى إيه
تبقى انتى أمى
وابنك التايه فى قلبك
هو أنا..
يعنى إيه
أثور عشانك
والقانى متأخر ولا
مليون سنة..
واجيب عدا بدل العدا
بين دا ودا
بلعن أبو اللى 
خلانى أآمن فى الندا
يعنى إيه
أبقى شرف
من غير شرف
يعنى إيه
كل اللى 
حاكمينك قرف
يعنى إيه
تبقى مساومة
أختار مابين حريتى
أو العَشا..
يعنى إيه
تتلوى بطنى بالجوع
من طلعة النور للعِشا
يعنى إيه
تبقى انتى أم الدنيا
وابنك ماهوش فاهم
حنان الأم..
حياته بين أحزان وغم
والقهر عم
قفل البيبان
والكل بان
إن كان شجاع
أو كان جبان
أو حد طالب مصلحة
متصلحة..
علشان يسود فوق القيود
ويقوم ويعمل مدبحة
يعنى إيه نلتقى فى الدين
سياسة..
يعنى إيه نلقى الدقون
دايبه (ف)نجاسة
تعلن الكفر عاللى
خاف بجد..
عاللى حاول يبنى سد
بين الآهات..
لعبة سياسة ولا دين
عايزيننا يعنى نقول آمين؟
طيب آمين
يا مصر ردى
داحنا ولادك الطيبين
قربنا نكفر بالحياة
أعلنّا نبض القلب موت
إفرد جناحك للسكوت
خلص.. وموت
أو توه فى قلب أم
خايفة تبقى أم
واسأل سؤالك
يعنى إيه
تبقى انتى أمى
وابنك التايه فى قلبك
هو أنا..
يعنى إيه
أثور عشانك
والقانى متأخر ولا
مليون سنة..
تأليف/ محمد أنور أبوزكرى

الاثنين، 28 مارس، 2011

البلابل


صحيت على صوت البلابل
لقيت صويت
نعى البلابل صفخة اولى
ف جورنال عبيط
صوت البلابل جوا ودنى
ومهاودنى
نبض قلبى جوا حضنى
كان واعدنى
يستمع صوت البلابل
على أى شجرة
فى أى غيط
لكن البلابل صوتها مات
هل الصوات
حتى الحمار
بشريطة سودا عالغبيط
وقفت على شجرة وبكيت
صوت البلابل
كان لى نور
كان لى جنية بحور
واما ماتت البلابل
سألت نفسى
هو صحيح مات الغُنى
ولا اللى مات نبض الحياة
وانا اللى وياه انتهيت
لما صحيت
على صوت البلابل
ولقيت صويت
تأليف/ محمد أنور أبوزكرى